Цыганский пересказ: Лилит Мазикина, Мария Иванова

Джидя про свэто екх тыкнинько чяёри. Латэ сыс гожо лолинько шапочка. Чяёри адякэ камэлас пэскри шапочка, со урьелас ла кажно дывэс. Паладава сарэ ла кхарэнас «Лолинько Шапочька».

— Лолинько Шапочка, — екх моло пхэндя дай чяёрьякэ. — Тыри пхуридай насвалы. Мэ пэкьём лакэ гудлэ парамарэ. Ян лэн собы ёй тэ хал.
— Мишто, даёри, — пхэндя Лолинько Шапочка, лыя кхувори парамарэнца и гэя кэ пхуридай.

Э пхурори дживэлас дро кхэр пал о вэш. Э чяёри на закамья тэ обджял о вэш и гэя вэшытконэ дроморэса. Ёй джялас и скэдэлас э лулудя пхуридакэ.
Вдруг э кустэндыр выгыя баро серо рув. Лолинько Шапочка никогда на дыкхья рувэн и на полыя кон ада. Ёй дажэ на здардя и только пхэндя:

— Лачё дывэс!
— Лачё дывэс, чяёри, — пхэндя рув. — Карик ту джяс?
— Мири мами¹ насвалы, и мэ янава лакэ парамарэ, — пхэндя Лолинько Шапочка.
— А кай тыри мами дживэла? — пучья латыр рув.
— Ёй дживэла дро тыкнинько парно кхэр пал о вэш.
— Тогда ту джяс на чячюнэс! Тукэ чеби тэ джяс одолэ дроморэса, — пхэндя рув и сыкадя вавир дроморо. Ёв обхохадя чяёрья. Вавир дроморо сыс длугэдыр. О рув придуминдя тэ припрастал ко кхэроро пэрвонэс и тэ хал пхурорья, а потом, прэ гудло, тэ хал и чяёрья.

Нэ Лолинько Шапочька адалэс на джинэлас. Ёй парикирдя рувэс и гэя ваврэ дроморэса. А рув сыго-сыго прастандыя кэ пхурорьякиро кхэр и припрастандыя пэрвонэс. Ёв мардя дрэ порта.
— Кон одой? — пучья пхурори.
— Адай мэ, тумари внучка! — уче глосорьяса пхэндя рув.
— Потырдэ шэлоро, лачи мири, порта откэрэлапэ!
О рув потырдыя шэлоро, порта откэрдяпэ, ёв прастандэя дро кхэроро и – ам! – хая пхурорья. А кокоро урья лакиро урибэ и пасыя дрэ пасинды. Ёв подуминдя со авэла дриван сабныткэс тэ прикэрэлпэ пхурорьяса.

Вот Лолинько Шапочка подгэя ко тыкнинько парно кхэроро. Ёй мардя дрэ порта.
— Кон одой? — пучья рув пхурорьякирэ глосьяса.
— Адай мэ, тумари внучка! — пхэндя Лолинько Шапочка.
— Потырдэ шэлоро, лачи мири, порта откэрэлапэ!
Лолинько Шапочка потырдыя шэлоро и порта откэрдяпэ. Чяёри вгэя дро кхэроро, чюдя лулудя дрэ вазочка и бэштя пэ пасинды. Ёй ґара на дыкхэлас мамья и на можынэлас тэ полэл со ласа на адякэ.

— Мами, мами, — пучья чяёри, — а палсо тутэ дасавэ барэ якха?
— Ада тэ дыкхав тут фэдыр, лачи мири! — пхэндя о рув.

— Мами, мами! А палсо тутэ дасавэ барэ кана?
— Ада тэ шунав тут фэдыр, лачи мири! — пхэндя о рув.

— Мами, мами! А палсо тутэ дасавэ барэ васта?
— Ада тэ облав тут зоралэдыр, лачи мири! — и адай о рув ухтылдя Лолинько Шапочка.

— Мами, мами! А палсо тутэ дасавэ барэ данда?!
— Ада тэ хав тут!!! — дыя годлы ё рув. Нэ только ёв откэрдя пасть, сыр э чяёри вырискирдяпэ лэскирэ вастэндыр. Ёй прасталас пир о кхэр и дэлас годля, а рув марэласпэ ла тэ ловинэл. Вэшэстыр выджянас охотники. Ёнэ шундэ годлы, впрастандынэ дро кхэр и умардэ рувэс, а потом вылынэ лэскрэ пэрэстыр пхурорья. Ёй сыс джиды, нэ дриван здарды.

И пхурори чяёрьяса укэрдэ охотникэн гудлыпнаса и парамарэнца.

¹ мáми - бабушка