Джидя про свэто екх пхивлы. Исыс латэ дуй чяя. Адава ромны сыс холямы тэ жано джювл́ы. Набут кон шундя латыр лаче лава. Э чяй пхурэдыр исыз сари сыр лакри дай. Никонэс на камэлас, на сыс латэ патыв никонэскэ. А вавир чяй, тэрнэдыр, исыс сари сыр лакиро дад: спокойно, весёло, лачи, патываса сарэнгэ. Чяя дуй сыс гожонэ, нэ коли холямы чяй джялас табороса, рома отрисёнас, а коли лачи чяй джялас, рома на гаравэнас муя.
Э пхивлы камья холямэ чя барэдыр, и на камья вавир чя. Саро дывэс холямы чяй сыс бэшты дрэ шатра и дыкхэлас дро глындало, а лачи чяй саро дывэс буты кэрэлас. Холямэ чякэ пхивлы дэлас ленты дро чюра, а лачи чяй вкхувэлас дро чюра фэлдытка лулудя.

Екх моло лачи чяй гэя пал о паны. Паш вэшытко ґанынг, кай э чяй всегда лэлас паны, ёй удыкхья пхуроро.

— Дэ мангэ тэ пьяв, чяе, — пхуроро мангэя. Чяй тутжэ лыя паны кхорэса тэ дыя лэс пхурорэскэ:

— Пи, папу, тэ яв састо!
Пхуроро попья тэ пхэндя:
— Наис тукэ, чяе! Тро йило сумнакуно, трэ лава сыр куч бара!
Сразу пала долэ лава ёв пропэя. Чяй здардя тэ припрастандыя дрэ шатра.
— Дае! — дыя ёй годлы, и тутжэ лакирэ мостыр пэя екх алмазо.
— Со да?! Со да?! — пучья пхивлы, тэ лакирэ якха явьян барэ сыр пирья.
Э чяй ракирдя ваш страннонэ пхурорэскэ. Кажнонэ чякирэ лавэса лакирэ мостыр пэя екх куч бар. Коли ёй отракирдя, паш лакирэ ґэра пашлэ сыс шэл алмазы, рубины, изумруды тэ вавир куч бара.
Тутжэ пхивлы кхардя вавир чя и пхэндя ла тэ лэл о кхоро, тэ джял ко вэшытко ґанынг и одой тэ дэл паны пхурорэскэ. Холямы чяй лыя тыкнинько рупуво кхороро и уджя ко вэшытко ґанынг.

Одой ёй лыя тэ дыкхэл дро паны сыр дро глындало. Сыго, кэ чяй явья видно учё мурш барэ калэ бродаса.
— Дэ мангэ тэ пьяв, чяе, — ёв мангэя. Холямы чяй збандякирдя муй.
— Вашсо ту джяс адай, коли мэ дужакирава вэшытконэ пхурорэс? — чяй пучья холямэ глосьяса. — Мишто, пи, только сыго, и на мэлякир о паны дро миро рупуво кхороро.
О мурш покачиндя шэрэса.
— Ту сан налачи чяй! Тро йило сапытко, тыро лава жамбитко!

Сразу пала долэ лава ёв пропэя. Холямы чяй здардя тэ упрастандыя дрэ шатра. Впрастандыя и дыя годлы:

— Дае, дае!!!

Тутжэ лакирэ мостыр пэя екх жамба и екх сап.

— Со да?! — пучья пхивлы. Холямы чяй лыяпэ тэ ракирэл, нэ лакирэ мостыр пэрэнас и пэрэнас жамбы и сапа, и лакри дай здардя. Ёй потрадыя холямэ чя шатратыр. Тэнчи ёй потрадыя и лаче чя.

Карик упрастандыя холямы чяй, никон на джинэл. А лачи чяй гэя дро вэш. Одой ёй джялас саро дывэс и бевеле выгэя прэ полянка. Прэ доя полянка тэрдо сыс барвало таборо. Екх тэрно гожо чяво удыкхья ла и пучья, катыр ёй пригэя. Чёрори ракирдя пэскрэ история. Кажнонэ лавэса лакирэ мостыр пэрдя екх куч бар.

— Ого! — чяво пхэндя. — Ту сан чяй лаче придынэса! Джя пал мандэ!

Лынэпэ ёнэ пал васта, пригэя дрэ чявэскри шатра и кэрдэ шэрэнца чавэскрэ дадэнгэ.

А про вавир дывэс исыс о бьяв. Саро таборо гулиндя, веселиндя, ягвин пия, мэ одой кхэлдём, тумэнгэ ракирдём.