Джид́э про св́это дай-бузн́ы тэ л́акирэ ́эфта бузнор́э. Ён́э джид́э дро т́ыкнинько кхэрор́о паш бар́о вэш. Кажно дыв́эс э дай-бузн́ы удж́ялас про дуратун́о лэнгор́о, про зэл́эно брэгор́о, тэ хал чярор́и. Бузнор́э жэ закэр́энас п́орта тэ сар́о дыв́эс кхэл́энас дро кхэр. Кажно бев́ель э бузн́ы яв́элас ко кхэр и мар́эласпэ дрэ п́орта: тук-тук-тук!
— Кон од́ой? — пуч́енас о бузнор́э.
Э дай-бузн́ы пхэн́элас:
Бузнор́алэ!
Чявор́алэ!
Тумар́и
Даёр́и
Явь́я,
И тум́энгэ тхудор́о
Лыджи́я!
— Даёр́и, даёр́и, — годлякир́энас о бузнор́э тэ откэр́энас э п́орта.
Варисав́о м́оло дай-бузн́ы угы́я про дуратун́о лэнгор́о, про зэл́эно брэгор́о, тэ хал чярор́и, а вэш́эстыр праст́андыя бар́о с́еро рув. Ёв подгы́я ко кхэрор́о и мард́япэ дрэ п́орта: тук-тук-тук!
— Кон од́ой? — о бузнор́э пучл́э.
— Мэ, тумар́и дай, — о рув пхэнд́я грубон́э глось́яса.
— Нан́э! Амар́и д́акири глос ис́ы сан́ы, башатун́ы, а тыр́и глос гр́убо, даран́ы… Ту на сан амар́и даёр́и, джя ад́атыр! — о бузнор́э дын́э годл́ы.
О рув угы́я, нэ нан́э дро вэш — ёв згарад́япэ т́эло кусто.
Вав́ир дыв́эс э дай-бузн́ы угы́я про дуратун́о лэнгор́о, про зэл́эно брэгор́о, тэ хал чярор́и, тэ ё рув пал́э мард́япэ дрэ п́орта: тук-тук-тук!
— Кон од́ой? — о бузнор́э пучл́э.
О рув пхэнд́я сан́э глось́яса:
— Мэ, тумар́и дай!
— Нан́э! Амар́и дай пхэн́эла вавр́э лав́а… Ту на сан амар́и даёр́и, джя ад́атыр!
И ё рув пал́э згарад́япэ т́эло кусто.
Бевел́е явь́я дай-бузн́ы тэ мард́япэ дрэ п́орта: тук-тук-тук!
— Кон од́ой? — о бузнор́э пучл́э.
Э дай-бузн́ы пхэнд́я:
Бузнор́алэ!
Чявор́алэ!
Тумар́и
Даёр́и
Явь́я,
И тум́энгэ тхудор́о
Лыджи́я!
— Даёр́и, даёр́и, — годлякирд́э бузнор́э тэ откэрд́э п́орта. Дай-бузн́ы вгы́я дро кхэр. А ё рув т́эло кусто вса шунд́я тэ рипирд́я со бузн́ы пхэнд́я.
Вав́ир дыв́эс э дай-бузн́ы угы́я про дуратун́о лэнгор́о, про зэл́эно брэгор́о, тэ хал чярор́и, тэ рув пал́э мард́япэ дрэ п́орта: тук-тук-тук!
— Кон од́ой? — о бузнор́э пучл́э.
О рув пхэнд́я сан́э глось́яса:
Бузнор́алэ!
Чявор́алэ!
Тумар́и
Даёр́и
Явь́я,
И тум́энгэ тхудор́о
Лыджи́я!
— Даёр́и, даёр́и, — дын́э годл́ы ё бузнорэ. Т́олько екх, кокор́о тыкн́о бузнор́о пхэнд́я:
— Нан́э! Амар́и дай никол́и на яв́эла ад́якэ с́ыго…
Нэ л́эскрэ пшал́а на шун́энас, и тогда ёв згарад́япэ пал э бов. Вавр́э бузнор́э откэрд́э п́орта. Дро кхэр впраст́андыя ё рув тэ — ам! — ха́я шов бузнор́э. Ёв на ха́я т́олько екх, кокор́о тыкн́о бузнор́о, с́остыр ёв на дыкс́я лэс. От́энчя рув праст́андыя дро вэш.
Явь́я дай-бузн́ы бевел́е кхэр́э. Со ад́а? П́орта откэрд́ы, кхэр чючё… Лы́япэ ёй тэ ров́эл, лы́япэ ёй тэ кхар́эл:
— Кай тум́э, мир́э бузнор́алэ? Кай тум́э, мир́э чявор́алэ?
Выгы́я кокор́о тыкн́о бузнор́о пирд́ал э бов и пхэнд́я:
— Даёр́и, даёр́и, ё рув ха́я мир́э пшалор́эн!
Э дай-бузн́ы холясы́я тэ праст́андыя дро вэш. Ёй латх́я ё рув. Ёв ис́ыз пасинд́уй бар́э пэр́эса.
— Дэ м́ангэ мир́э чявор́эн! — ды́я годл́ы дай-бузн́ы.
— Со ту пхэн́эс, мэ на джин́ом тыр́э чявор́эн, — о рув пхэнд́я.
Э дай-бузн́ы
топчинд́я
ґэр́энца,
крэнцинд́я
якх́энца,
тринскирд́я
шынгэнца
и путрад́я рув́оскиро пэр!
О рув мы́я, л́эскро пэр пхарады́я, тэ од́отыр ухт́э шов бузнор́э.
Дай лы́я лэн кхэр́э, а бевел́е ёй кэрад́я бар́о гудл́о парам́о пхаб́энца.
| 
